क्वारंटईन होण्यास नकार देणाऱ्या माजी झेडपी अध्यक्षासह कुटुंबातील तिघांवर गुन्हा दाखल
क्वारंटईन होण्यास नकार देणाऱ्या माजी झेडपी अध्यक्षासह कुटुंबातील तिघांवर गुन्हा दाखल
सेनगाव - कोरोना बाधित व्यक्तीचा संपर्कात असल्यामुळे आरोग्य तपासणी करून विलगिकरण कक्षात जाण्यासाठी सूचना करूनही घरीच बसून राहिल्याबद्दल, हिंगोलीच्या माजी झेडपी अध्यक्षासह कुटुंबातील तिघांवर गुन्हा दाखल करण्यात आला आहे. हा गुन्हा सेनगाव पोलिसांनी दाखल केला आहे.
याबाबत सेनगाव नगर पंचायतीचे मुख्याधिकारी शैलेंद्र फडसे यांनी दिलेल्या फिर्यादीवरून हा गुन्हा दाखल करण्यात आला आहे. कोरोनाबाधित व्यक्तीच्या संपर्कात असल्यामुळे तालुका कॉन्टॅक्ट ट्रेसिंग टीमने हिंगोलीच्या माजी जिल्हा परिषद अध्यक्षा सरोजनी खाडे, त्यांचे पती कुंडलिक नथुजी खाडे, मुलगा सतीश आणि सून मिरा खाडे यांना आरोग्य तपासणी करून विलगिकरण कक्षात जाण्यासाठी सूचना केल्या होत्या. परंतु शासकीय आदेश न पाळता हे सर्व आरोपी दिनांक १७ जुलै ते २२ जुलै दुपारी १२ वाजेपर्यंत आपल्या घरीच राहिले. तसेच त्यांनी क्वारंटईन होण्यास नकार दिला. त्यामुळे माजी झेडपी अध्यक्षा सरोजनी खाडे यांच्यासह त्यांच्या कुटुंबातील वरील आरोपींवर भादंवी कलम १८८, २७०, ३४ आणि साथरोग प्रतिबंधक कायदा कलम ४ नुसार गुन्हा दाखल झाला आहे. अनेक जण आपले राजकीय वजन वापरून किंवा आपल्या खोट्या प्रतिष्ठेचा आव आणून शासकीय आदेशाचा भंग करीत आहेत. हि मनोवृत्ती समाजासाठी घातक असल्याने इतरांचे आरोग्य धोक्यात आले आहे. अशा लोकांवर या प्रकारची कठोर कारवाई होणे अपेक्षित आहे.
