हिंगोलीत शासकिय कार्यालयांचे कामकाज ठप्प,जिल्हाधिकारी यांच्याकडे निवेदन
हिंगोलीत शासकिय कार्यालयांचे कामकाज ठप्प,जिल्हाधिकारी यांच्याकडे निवेदन
राजपत्रित अधिकारी महासंघाच्या कामबंद आंदोलनाला संघटनांचा पाठींबा
हिंगोली - हिंगोली येथील निवासी उपजिल्हाधिकारी चंद्रकांत सुर्यवंशी यांना चुकीची वागणुक देणाऱ्या उपनिरीक्षकावर निलंबनाची कारवाई करावी यासह इतर मागण्यांसाठी राजपत्रित अधिकारी महासंघाने सोमवारी (ता. १५) कामबंद आंदोलन सुरु केले. या आंदोलनाला विविध संघटनांनी पाठींबा दिल्यामुळे सर्वच शासकीय कार्यालयांचे कामकाज ठप्प झाले आहे.संघटनांनी जिल्हाधिकारी रुचेश जयवंशी यांच्याकडे निवेदन सादर केले.
येथील निवासी उपजिल्हाधिकारी सुर्यवंशी यांचे वाहन अडवून त्यांना चुकीची वागणून देण्यात आली. उपनिरीक्षक साईनाथ अनमोड यांनी प्रकरण मिटले असतांनाही सोशल मिडीयावर काही बाबी व्हायरल केल्या. निवासी उपजिल्हाधिकारी हे अतिरिक्त दंडाधिकारी असतांनाही त्यांना उपनिरीक्षक अनमोड यांनी दिलेली वागणुक चुकीची असल्याचा आरोप करण्यात आला आहे. त्यांच्यावर निलंबनाची कारवाई करावी या मागणीसाठी आज कामबंद आंदोलन करण्यात आले.
यामध्ये महासंघाचे सचिव रामदास पाटील यांच्यासह उपविभागीय अधिकारी प्रशांत खेडेकर, अतुल चोरमारे, प्रविण फुलारी, जिल्हा नियोजन अधिकारी किरण गिरगावकर, अतिरिक्त मुख्यकार्यकारी अधिकारी डॉ.मिलींद पोहरे, आदिवासी प्रकल्प अधिकारी डॉ. विशाल राठोड, उपमुख्यकार्यकारी अधिकारी धनवंत माळी, गणेश वाघ, नितीन दाताळ, तहसीलदार कैलासचंद्र वाघमारे, गजानन शिंदे, ज्योती पवार, पांडूरंग माचेवाड, जीवककुमार कांबळे, कर्मचारी संघटनेचे तत्तापुरे, गोपाल कंठे, विनोद ठाकरे यांच्यासह अधिकाऱ्यांनी नियोजन विभागाच्या सभागृहात एकत्र येऊन कामबंद आंदोलन सुरु केले.दुपारी तीन नंतर जिल्हाधिकारी यांनी पोलीस विभागाचा अहवाल काय येतो त्यानंतर आपण कारवाई करू असे अश्वासन संघटनेला दिले. त्यानंतर कामकाज सुरु झाले.
या आंदोलनास तलाठी संघटना, महसुल कर्मचारी संघटना, पालिका कर्मचारी संघटना, कृषी संघटना यासह इतर संघटनांनी पाठींबा देत काम बंद आंदोलन सुरु केले आहे. त्यामुळे जिल्हाभरात पोलिस विभाग वगळता सर्वच विभागांचे कामकाज ठप्प झाले होते. पोलिस विभागाने संबंधीत अधिकाऱ्यावर कारवाई न केल्यास आत्यावश्‍यक सेवा वगळून बेमुदत कामबंद आंदोलन करण्याचा इशारा देण्यात आला आहे.यावेळी काही अधिकाऱ्यांनी घडलेल्या प्रकाराबाबत मनोगत व्यक्त केले.
